KONKA

bAbarirwa mu 1000 muri 13,124 ni bo bashobora kutemererwa kwinjira muri Kaminuza y’u Rwanda

Kaminuza y’u Rwanda (UR) yatangaje ko yakiriye ubusabe bw’abanyeshuri 13, 124 bashaka kuyitangiramo mu mwaka w’amashuri wa 2017-2018, abo ishobora kutazemerera bakaba babarirwa mu 1000 gusa.

Iyi kaminuza yatangarije IGIHE ko yakiriye ubusabe bw’abanyeshuri 13,124 ariko ikaba ifite imyanya ibihumbi 12 gusa; bivuze ko abatabona imyanya ari 1124.

Nubwo ariko UR ifite iyo myanya, yatangaje ko hari abanyeshuri 972 muri 13,124 basabye kuyigamo batanze ibyangombwa bituzuye, basabwaga kubyuzuza bitarenze ku wa 27 Nyakanga 2017.

Mu kiganiro IGIHE yagiranye n’Umuyobozi mukuru wungirije wa Kaminuza y’u Rwanda ushinzwe amasomo n’ubushakashatsi, Prof. Nelson Ijumba, mbere gato y’uko Kaminuza ifunga kwakira ibyangombwa by’ababitanze bituzuye, yagaragaje ko umubare w’abo iyi kaminuza izakira utaramenyekana neza.

Yagize ati “Ubu twashyize ahagaragara urutonde rw’abanyeshuri batujuje ibisabwa n’ibyo basabwa gukora.”

Yakomeje avuga ko no muri abo barenga 900 batanze ibyangombwa bituzuye, ababyujuje nyuma bazasuzumwa UR ikabona gutoranya abo izakira mu mwaka w’amshuri uteganyijwe gutangira muri Nzeri 2017.

Bimwe mu bigenderwaho hatangwa umwanya muri Kaminuza y’u Rwanda ni amanota umunyeshuri yagize mu bizamini bisoza amashuri yisumbuye, ibyo yasabye kwiga n’ubushobozi bw’aho yabisabye.

Kaminuza y’u Rwanda yatangaje ko nimara gusesengura ubusabe bwa bose izahita vuba aha itangaza abemerewe.

Kaminuza y’u Rwanda ifite amashami atandukanye hirya no hino mu gihugu arimo Ishami ry’Ubumenyi n’ikoranabuhanga; Ishami ry’ubuvuzi n’ubumenyi mu by’ubuzima ; Ishami ry’Ubucuruzi n’Ubukungu ; Ishami ry’uburezi ; Ishami ry’ubuhinzi, ubworozi n’ubuvuzi bw’amatungo; n’Ishami ry’Ubugeni n’ubumenyi rusange.

Abanyeshuri bemererwa kwinjira muri Kaminuza y’u Rwanda si ko bose bahabwa amafaranga yo kubatunga azwi nka Buruse. Abasabye kwiga muri UR bahita batangira inzira yo gusaba inguzanyo itangwa hagendewe ku manota, ibyo umuntu agiye kwiga n’icyiciro cy’ubudehe abarizwamo.

Abemerewe inguzanyo bashyirwa ahagaragara n’Ikigo gishinzwe guteza imbere uburezi (REB) nyuma y’uko Kaminuza yamaze gusohora abo yakiriye. Aba banyeshuri basinyana amasezerano na BRD yeguriwe inshingano zo gutanga no kwishyuza inguzanyo.

 

Icyicaro gikuru cya UR i Kigali
src.igihe.com

 


90,285 total views, 2 views today

Leave a Reply

Your email address will not be published. Required fields are marked *