KONKA
Breaking News

Uko byaba byifashe mu cyumweru cya mbere cy’intambara ya 3 y’isi iramutse irose

Uko byaba byifashe mu cyumweru cya mbere cy’intambara ya 3 y’isi iramutse irose

Byaba bibabaje kandi biteye agahinda mu gihe muri iyi si haba hari abantu mu ngeri zitandukanye, batekereza intambara y’isi ya 3 nk’ikintu kidashoboka, cyangwa cyaba gitunguranye mu gihe yaba ibaye.

Intambara ya 3 y’isi ni ikintu kiba gishobora kwaduka ku isaha iyo ariyo yose, bigora bamwe kubyumva kubera kwihesha amahoro mu mitima yabo, nko kwanga kumva inkuru bamwe bita incamugongo, nyamara atari ibimenyetso bibuze bihamya iby’iyi ntambara ikaze, ahubwo ari ugutinya kumva inkuru zayo.

Nyamara imyitozo ikaze y’intambara, n’imbwirwaruhame rutwitsi z’abakuru b’ibihugu bikomeye mu by’intwaro zikomeje gucicikana mu itangazamakuru mpuzamahanga, ubwabyo ni ikimenyetso zimusiga cy’akaga k’intambara ya 3 y’isi ishobora kwaduka isaha iyo ariyo yose.

Ntibyumvikana ukuntu abantu bajyaho bagatekereza ko ikintu nk’intambara runaka kidashoboka, kandi no ku nshuro ya 1 cyarabayeho ndetse nyuma y’imyaka isaga 20 hakarota indi ,none abantu bakagirango na nyuma y’imyaka 70 intambara ya 2 y’isi ibaye ,hari icyabuza intambara ya 3  kubaho !

Rwose ikiremwamuntu mu kubaho kwacyo, ntikijya gishaka umuntu ukibwira ibintu bibi bishobora kugwirira isi, iteka abantu bamwe kandi benshi ni ababa bumva babwirwa ibintu byoroshye kandi bisusurutsa imitima, cyane cyane bitarimo ibikomeye nk’intambara n’ibindi.

Gusa hari ibyo abantu banga urunuka bibageraho ,nk’urupfu ,indwara z’ibyorezo , Ibiza ,imitingito,imyuzure,inzara n’ibindi, biri mu byo muntu ahura nabyo kenshi gashoboka kandi atabyifuzaga .

Ikibabaje ariko ni uko hari ababirenganiramo batanazi uko icyago iki cyangwa kiriya kiba cyaje, n’icyakizanye igice kitari gito cy’abatuye isi ,ni ikibona ibintu bihinduka bibi ,kandi nta n’imbaraga bafite zo kubihagarika,ababitera bigaramiye nk’aho nta cyabaye.

Igitabo gitagatifu, Bibiliya Yera mu Ivanjili ya Matayo ibice 24  ku murongo wa 6 ,havuga hati : “Muzumva iby’intambara n’impuha z’intambara, mwirinde mudahagarika umutima kuko bitazabura kubaho ariko imperuka izaba itaraza”.

Ku murongo ukurikiyeho hagira hati : “Ishyanga rizatera irindi shyanga , n’ubwami buzatera ubundi bwami, hazabaho inzara n’ibishyitsi hamwe na hamwe”.

Ibi ubwabyo ni ibintu byahanuwe mu myaka hafi 2000 itambutse ,nyamara abantu bumvaga ari nk’umugani ariko niba hariho gusesengura, nta na kimwe cyavuzwe muri iriya mirongo kitabonekera amaso ya rubanda rutuye isi ya none .

1.Incamake ku ntambara 1 n’iya 2 zashegeshe isi

Intambara ya mbere y’isi yatangiye ku wa 28 Nyakanga 1914 isozwa kuwa 11 Ugushyingo 1918 . Ni intambara yamaze imyaka 4 n’amezi 3 n’ibyumweru 2.

Iyi ntambara kandi bivugwa ko yarwanywe n’imbaga y’abasirikare basaga miliyoni 60 baturukaga mu mahanga yose atuye isi.

Muri abo bose kandi abasirikare bahitanywe nayo basaga miliyoni 10 hamwe n’abasivili bayitikiriyemo. Abasaga miliyoni 20 yabasize ari ibisenzegeri kubera gukomerekera muri yo.

Ikindi cyago karundura cyabaye muri iyo ntambara ni jenoside yakorewe abanyarumeniya ku va 1915-1916 ndetse n’ikiswe Impinduramatwara y’Abarusiya mu 1917, hamwe n’ikiswe Ibicurane byayadutsemo bigahitana benshi.

Iyo ntambara kandi ,nyuma y’aho irangiriye mu 1918  ,habayeho impinduka nyinshi ku isi zishingiye ku nyungu za politiki z’ibihugu by’ibihangange byayesuraniyemo [ Confilit d’Intêret Géopolitique ]

Nta kintu na kimwe kizima iyi ntambara yazaniye iyi si uretse kuba ibihugu bikomeye byarumvanye imitsi ,muri uko kwipima ingufu bya bihugu bikaza kuzigeragereza mu ntambara ya 2 y’isi yakurikiye nyuma gato y’imyaka 30 yakurikiye iya 1, nayo yabaye rurangiranwa mu mateka .

Nk’uko byavuzwe haruguru rero, iyi ntambara ya 2 y’isi irota, uretse kuba ibihugu bikomeye nk’Ubudage n’Ubwongereza, Ubufaransa, Autriche, Uburusiya, Amerika n’andi mahanga byarigaragaje nk’ibihiganwa mu butwari bwa gisirikare gusa,nta kindi kitari ugusenya isi byazaniye muntu.

Gusa kuri iyi nshuro Abadage bari nyirabayazana b’iyo     ntambara baratsinzwe ,intambara isa  n’icogoye ityo ariko yoretse imbaga. Izi ntambara zose wasangaga zihuje amatsinda y’ibihugu bikaze hakurikijwe uko ibihugu byabaga bifitanye ubucuti n’amasezerano mu byo kurwanira hamwe.

Gusa intambara ya 2 y’isi yose yahuruje abasirikare miliyoni 100 ,kandi ihitana abantu basaga miliyoni 64 zose . Iyi kandi niyo ntambara ikaze yabayeho mu mateka y’isi kuva yaremwa.

2.Uko byaba byifashe ku munsi wa mbere w’intambara ya 3 y’isi ,mu gihe yaba irose, mu masaha 24 ya mbere

Icya mbere: Nk’uko byumvikana, kwaba ari uguhangana gisirikare kw’ibihugu bibiri byaba byayishoje, noneho hagakurikiraho ukwisuganya kw’ibihugu by’incuti, bigamije gutabarana bitewe n’uko byiyemeje gutabarana.

Uku guhangana ariko, ntikwaheraho gushoza intambara yakoresha intwaro za kirimbuzi nk’uko bamwe babyibwira.

Ahubwo kuri iyi nshuro, habaho ugusigana kw’ibihugu bikomeye bihuriye mu Kanama k’Amahoro k’Umuryango w’Abibumbye hagamijwe ku cyagarura amahoro mu bihe bikaze nk’ibyo.

Kimwe mu bintu bibabaje byabaho, ni uko Amerika yahitamo gusesa uyu muryango wa Loni, maze ikirukana abadipolomate bose bakorera muri New York, hagasigara abahagarariye ibihugu byabo muri Amerika.

Muri icyo gihe New York  hacika igikuba, cyane ko hari ibihugu byaba bifite inyungu zo kubona uyu muryango usa n’usigaye ari baringa wavaho burundu, gusa kuba hari igihugu cyaba gifite ubundi buryo bwasimbura Loni mu isi byaba ari ukubeshya gukabije.

Ikigaragara cyo ni uko isi yaba yinjiye mu kaga ko kwikubira hamwe mu matsinda y’uduhugu twinshi, mu gisa no gushimangira ukugira aho buri gihugu cyaba kibogamiye ,mu mpande zaba ziri kugaragaza imbaraga ,muri yo ntambara ya 3 y’isi yaba ibica bigacika ,ubwo buri gihugu cyaba nyamwigendaho , cyangwa hakabaho kwiyomeka ku mahanga akize mu mafaranga , mu byukuri bwaba ari ubukoloni bushya bwaba bwadutse.

Mu gihe nyamara amazi yaba yamaze kurenga inkombe, nibwo abantu bamwe aba bitwa ba Rusahuriramunduru ,yane cyane  muri Afurika bashobora kwitwikira iyi ntambara yaba yarose, bagahirika ubutegetsi bumwe na bumwe.

Mu bihugu byaba bitwarwa gisivili, ababuhirika bakaba baba bitwaje ko abo basivili bayoboye badashoboye gutegeka mu bihe by’intambara ikomeye ya 3 y’isi yose.

Muri ibyo byose kandi abo ba Rusahuriramundura baba bafashijwe n’ibihugu bikomeye mu ibanga, hagamijwe ko babitera inkunga [ abo baba bahiritse ubutegetsi ] .

Inkunga ubwayo yaba iy’abasirikare bo kubifasha muri yo kimwe n’uko hashobora kuba hari abakwitwaza iyi ntambara y’isi ,bagatangira gusahura ibihugu byabo, batanazi aho bajyana ibyo bisahurano, kuko hose byaba ari umuzurungutano w’intambara y’akataraboneka.

Icya kabiri : Mu gihe buri gihugu cyaba kiri kumaranira kurundanya abasirikare bacyo ku mipaka, hamwe no guhamagara abavuye ku rugerero [ Reserve Forces ], hamwe n’ibindi byaba biri gucyura abasirikare babyo bagiye mu butumwa bw’amahoro ku isi, kugirango bajye gutabara no kurwanira ibihugu byabo baturutsemwo;

Ntawatangazwa n’uko mu bihugu bifite amoko cyangwa imiryango ihora ikimbiranye hashobora kwadukamo ugusubiranamo, ahanini kwaba kuvuye ku kuba isi yaba irangariye mu bibazo bikomeye .

Buri gihugu kiri kwirwanaho mu byaba bigisumbirije, bityo kubera igitsure cy’umuryango mpuzamahanga cyaba kitariho,bikaba byateza kwicana kw’abari barabuze uburyo bwo kumarana kw’ababituye.

  1. Dore bamwe mu bantu bakwibasirwa, mu gihe isi yaba ihugiye mu ntambara y’isi yose ya 3

Nkuko Bwiza.com yabigaragaje mu ntangiriro z’iyi nkuru, mu ntambara ya mbere n’iya kabiri y’isi, ikibazo cy’uko hariya hakurya babaga bari kurwana, hakuno bakihererana abandi bantu bakarimbagura, nkuko byagenze kuba nya Armeniya n’Abayahudi mu Budage, cyarigaragaje cyane.

Kuri ubu rero ni igihe cyo kwibaza koko niba nta bantu cyangwa ibihugu bifite amoko cyangwa imiryango ibana ku manegeka, hamwe abafite intege nke bashobora kurimburwa, bitwaje ko isi isa n’ihugiye mu ntambara ikaze.

Dore urugero rw’ahantu (muri Afurika) mu gihe gito haba hamaze kuba isibaniro kandi hagatikirira imbaga itagira ingano 

A.Mu Burundi: Imbonerakure zakwihererana abo zidashaka zikarimbagura, ku manywa y’ihangu kubera nta gitsure cyaba kiri ku butegetsi bwa Bujumbura, harokoka mbarwa. Nta kabuza intambara ya 3 y’isi yadutse u Burundi bwaba umuyonga kandi abarundi bakwimaranira ubwabo.

B.Centrafrique : Imitwe ya Antibalaka cyangwa Seleka yahaguruka n’imizi n’imiganda ikarimburagurana.

N’igihe cyo kwibaza gutya; Niba abaturage ba Centrafrique bashobora guhigana bukware kandi umuryangompuzamahanga ubacungira hafi, mu gihe cyo Ingabo z’amahoro za Loni zabacungaga zaba zikuriyemo akarenge, hacura iki ?

Ibi ni ibintu abantu baba bakwiriye gutekerezaho, batibwira ko kubuza umutwe gutekereza byabuza ko ikibi kibaho, ibyabaye mu Rwanda MINUAR yurira indege igasiga abantu mu icuraburindi, no muri Centrafrique byashoboka, buri gihugu gisama amagara yacyo.

C. M23 muri Kivu ya Ruguru yakongera igakozanyaho n’Ingabo za Congo Monusco yitahiye

Muri icyo gihe ibintu byaba biri gucika hagati ya bya bihugu bya rutura ubwabyo, umuntu atekereje ko amahanga yaba ahugiye mu ntambara ya 3 y’isi , hari imitwe kandi y’inyeshyamba yari yarazimye itabura kubura agahanga.

Umwe muriyo mitwe ni nka Mouvement du Vingt Trois Mars ,wahoze urwanira mu Burasirazuba bwa Republika Iharanira Demkarasi ya Congo, cyane ko uyu mutwe utatsinzwe n’imbaraga za gisirikare cya Congo bwite, ahubwo ari Loni yashyizeho Brigade yihariye yari ifite inshingano zo gukuraho uyu mutwe.

D. Sudani y’Epfo : Muri iki gihugu abasirikare bashyigikiye Leta ya Salva Kiir bahita bagaba ibitero bikaze ku mute wa SPLA/IO wa Riek Machal, ariko mu gihe gito ,izi ngabo za Sudani y’Epfo zaba zimaze kugezwa ahabi, mu gihe zaba zitakibona iza Uganda zikunze kuzitiza umurindi hafi aho,nta cyemeza ko imirwano ikaze itakwaduka muri iki gihugu.

Amakimbirane asasiweho ari mu bihugu bitandukanye, mu gihe iyi ntambara yarota, yakongera agasubira ibubisi, iteka bitewe no guhuga ku isi yaba ihanze amaso akaga k’iyi ntambara.

3.Uko ibihugu byabanza kwesurana buri kimwe gishaka kubanza kwikiza umwanzi wa cyo cyari kirwaye inzika

Muri iki cyiciro Bwiza.com yagerageje kureba ibihugu bisanzwe bifitanye umubano udakomeye, aho buri kimwe muri ibyo bihugu kiba kitabanye neza n’ikindi.

Hagati y’u Bushinwa na Taiwan : Mu masesengura Bwiza.com yakomeje ikora ku cyakurikiraho nyuma y’intambara y’isi ya 3 hanarimo ko igihugu cy’u Bushinwa, mu gihe urugamba rwarema , nta kabuza iki gihugu nticyajya gutabara Koreya ya Ruguru nk’uko bamwe babitekereza kitabanje kwinovora ibirwa bya Taiwan byabwigometseho.

Ni mu gihe kandi bivugwa ko Leta Zunze Ubumwe za Amerika hari ibitwaro bya Misile zashyize ku butaka bwa Taiwan , mu rwego rwo kurinda umutekano wayo, mu kubuza ko u Bushinwa bwazatera iki kirwa gifite ubwigenge bucagase.

Gusa n’ubwo bimeze gutyo u Bushinwa buhorana umujinya wo kuba butagenzura Taiwan ,kandi Leta ya Taipei nayo ikaba itajya ijenjeka mu rwego rw’uko yakwitwara mu gihe ibintu byaba bibi.

U Bushinwa kandi bwaharanira kwigarurira agace ka South China Sea gaherereye mu Nyanja ya Pasifika, kagwiriyemo amato y’intambara ya Leta Zunze Ubumwe za Amerika .

Mu by’ukuri iki gihugu cy’u Bushinwa kikaba gihora kikanga ko Amerika yakoresha aya mato mu kukirasaho, cyane ko muri aya mato ya Amerika harimo nk’ubwitwa  USS Carl Vinson bunasanzwe bunafite ubushobozi bwo guhangana no kurasa ibitwaro bya kirimbuzi [ Porte Avion à Propulsion Nucléaire ].

Ku ruhande rw’u Burusiya n’ibihugu byahoze biri kumwe bikitwa (RSS) haca uwambaye

Guhera ku ya 08 Werurwe 2014, igihugu cy’u Burusiya kigaruriye bidasubirwaho akarere ka Crimea kari gasanzwe ari intara y’igihugu cya Ukraine.

Abasesengura ibijyanye n’umutekano na dipolomasi bavuga ko kiriya cyari igikorwa cyo kubwira isi ngo “u Burusiya burambiwe kuvogerwa n’u Burayi”.

Bwiza.com kandi ikomeza kwibutsa abasoma iyi nkuru ko hari habanje igikorwa cy’uko Moscow yari yatanze akayabo k’amafaranga yari yagenewe kuzahura ubukungu bwa Ukraine ,ariko Leta ya Ukraine ikanga inkunga y’u Burusiya.

Kuba rero u Burayi bwarabaye nk’ubureshya Kiev, u Burusiya bugasa n’ubwari bushyizwe ku ruhande, byateye Vladimir Poutin gutegeka urwego rw’iperereza rw’igihugu cye gutegura uko n’ubwo Ukraine yagenda, ariko itajyana n’intara ya Crimea .

Kuva ubwo, iyi ntara itegura amatora ya Referendum yagombaga kwemeza ko ibona ubwigenge, bwayemereraga guhitamo aho yabogamira, hagati ya Ukraine n’u Burusiya.

Ukraine yarahanyanyaje ngo iburizemo ibyo byose ariko biranga ,yewe hazamo n’imitsi ya gisirikare ,inyeshyamba zafashwaga n’Abarusiya zitsinda uruhenu igihugu cya Ukraine, Crimea birangira yomeswe ku Burusiya.

Mu ntambara ya 3 y’isi, nta gushidikanya ko u Burusiya bwahangana n’uduhugu nka Estonia ,Lativia ,Kazhakistan n’ibindi byahoze bifatanye kera bikiyomora ku Burusiya.

Moscow rero ku bigaragara ,ntizajya gutabara Koreya ya Ruguru ,itigaruriye utu duhugu,cyangwa ngo isenye ibirwanisho bya NATO bishinze muri two ,ibi bikoresho bikaba byitwa ko biba bigenzura umutekano w’ibihugu bigize NATO ,nyamara ari amaco yo kugenzura no kugariza u Burusiya , bikorwa n’u Burayi na Amerika.

Hagati ya Israel n’abarabu ndetse na Palestine by’umwihariko

Nk’uko bigaragara mu nkuru iri ku rubuga rwa interneti ‘The Guardian, cyandikirwa mu Bwongereza cyo ku wa 27 Ukwakira 2005 , uwari Perezida wa Iran, Bwana Mahmoud Ahmadinejad ,ubwo yari muri Kaminuza nkuru ya Téhéran kuri iyo tariki The Guardian yandikaga iyo nkuru, yatangarije abanyeshuri baho ko Iran ifite umugambi wo gusiba Israel ku ikarita y’isi.

Kuba umukuru wa kimwe mu bihugu bikomeye mu bya gisirikare by’abarabu yarahangaye kuvuga aya magambo, byabaye nko kwandika amateka mashya kuri Iran by’umwihariko ndetse no kuri Israel ku rundi ruhande.

Byari bisobanuye ko Israel yagombaga guhita itegura kwirwanaho ,mu cyo yo [ Israel ] yafataga nk’itangazo ry’intambara kuri Leta y’Abaheburayo.

Gusiba Israel ku ikarita, byari nk’ubutumwa bweruye buvuga ngo : “Uzatanga undi hagati ya Israel na Iran, azasibanganye undi kuri iyo karita y’isi”!

Mu mvugo zibaho ku isi mu buryo ibihugu bibanamo ,ntihabamwo ijambo “Gusiba igihugu ku ikarita y’isi” ,aya ni amagambo Bwana Donald Trump aherutse kuvuga nawe atangaza ko yasenya Koreya ya Ruguru igihe icyo aricyo cyose, ahafatwa nk’itangazo ry’intambara ubusanzwe.

Ni muri urwo rwego rero, uguterana amagambo kw’ibihugu kudahosha intambara ahubwo kuba gushobora kuyishoza, byatinda byatebuka.

Intambara ya 3 rero y’isi ntiyamara 2 cyangwa gatatu, ari Iran cyangwa Israel, ntawugerageje gusiba undi ku ikarita y’isi dore ko Israel na n’ubu ngo yamaze kumanika ibyogajuru byo kuneka intambwe zose Iran yatera isatira gusohoza umugambi wayo,kugirango Israel ihite yereka Iran ubuhangange bwayo.

Israel kandi nta washidikanya ko iyi ntambara ibayeho ,ibihugu by’abarabu byahengera Leta Zunze Ubumwe zihuze ,bikayigabaho ibitero bya simusiga nk’uko byagenze mu 1967, mu ntambara yitiriwe iminsi 6, iyi ntambara ariko ikaba itarahiriye abarabu, kuko iki gihugu cyatsinze bitangaje abarabu.

Ntawashidikanya kandi ko Israel yakwikinga muri iyi ntambara,ikaba yahita ishaka uko yigarurira utundi turere twa Palestine turimo umujyi wa Yeruzalemu y’Iburasirazuba, iherereye mu karere ka Westbank ndetse n’ubutayu bwa Sinai bwose yemwe na Gaza kuri ubu itegekwa n’umutwe wa Hezbollah .

Uwavuga ku ntambara karundura y’isi ya 3 n’ibyago byayikurikira ntiyabirangiza, gusa nk’uko Bwiza.com izakomeza kubagezaho ibyegeranyo kuri iyi ntambara ihora itutumba ntabwo na mba isi yakwibwira ko bene iyi ntambara imaze gutikiza imbaga inshuro 2 zose itashobora kwisubiramo no ku nshuro ya 3 cyangwa .

Kutabitekereza kwaba ari ukwima ubwenge inshingano yo gutekereza, cyane ko hari inyandiko za bamwe mu Bongereza banatangaje imiterere ya zimwe mu mbwirwaruhame z’abategetsi bo ku isi zakurikira itangizwa ry’iyi ntambara simuziga.

Gusa ntihagire utekereza ko ibitwaro bya kirimbuzi biri mu byakoreshwa ku ikubitiro, kuko inashobora kurangira nta na kimwe kirashwe, kuko n’ababitunze ubwabo batinya bene ibi bitwaro bitagira n’umwe bizigama harimo n’ababitunze ubwabo.

src.bwiza.com

18,641 total views, 1 views today

One comment

  1. What’s up,I read your new stuff named “Uko byaba byifashe mu cyumweru cya mbere cy’intambara ya 3 y’isi iramutse irose – Amakuru mu binyamakuru bitandukanye kw’isi” regularly.Your writing style is witty, keep it up! And you can look our website about free ip proxy.

Leave a Reply

Your email address will not be published. Required fields are marked *