KONKA
Breaking News

Mineduc na Transparency bakemanze uburezi butangirwa muri ‘Cours du soir’

Minisiteri y’Uburezi (Mineduc) n’Umuryango urwanya ruswa n’akarengane, Transparency International Rwanda, barakemenga uburezi butangwa n’abigisha amasaha y’umugoroba, ko mu gihe hatabayemo ubunyangamugayo bw’umurezi nta kamaro bigira.

Transparency International Rwanda ivuga ko hari ibimenyetso ubu buryo bugaragaza bituma habamo ruswa naho Mineduc yo ikamagana abarezi baha abana ibyo bazababaza kugira ngo banezeze ababyeyi babo.

Akenshi usanga bamwe mu babyeyi bafite ubushobozi basaba abarezi kuza kubafashiriza abana gusubiramo amasomo ndetse n’abanyeshuri bakabyishimira ko iyo basubiye ku ishuri bukeye hari ubundi bumenyi baba bungutse burenze kubwo bari bavanye mu ishuri, banarusha abatabonye ayo masomo.

Umuyobozi wa TI-Rwanda, Ingabire Marie Immaculée , yabwiye TV1 dukesha iyi nkuru ko ayo masomo ya nimugiroba afitanye isano na ruswa kandi ko rimwe na rimwe umukoro uba wagenewe umwana, ukorwa na mwarimu ari kumusubirishamo.

Yagize ati “Simbihamya kuko sinababonye ariko birashoboka ko hatangirwa na ruswa. Ikindi, bariya barimu bafasha abana gukora umukora, kandi uba wahawe umwana.”

Umunyamabanga wa Leta muri Mineduc ushinzwe amashuri abanza n’ayisumbuye, Isaac Munyakazi, we yamaganye by’umwihariko abarezi bajya kwigisha abana amasomo y’umugoroba barangiza bakababaza ibyo baraye baberetse kugira ngo bashimishe ababyeyi babo.

Yagize ati “Aje kugufashiriza umwana kugira ngo azatsinde ibizamini, akore ubusa narangiza kuko ariwe umwigisha azamuhe amanota kugira ngo akwereke ko umwana hari ibyo azi ariko mu by’ukuri ntacyo azi. Numva binajyanye na ba bandi bigisha mu mashuri asanzwe aho umwarimu byaba byiza ko agaragaza ko isomo yigisha abataryumvise akarisubiramo aho kubaha amanota yo kwereka ababyeyi ati ‘umwana wawe rwose ni igitangaza’ ariko wajya kureba ugasanga ntacyo afite mu mutwe […] hagomba kubamo ubunyangamugayo no gukorera wa mubyeyi icyo yamutumye.”

Yakomeje asobanura ko iyo bitagenze uko, umurezi aba abaye inkundamugayo kandi ko byanze bikunze bigera aho bikagaragara ko umurezi yakore ubusa.

 

Umuyobozi wa Transparency International Rwanda, Ingabire Marie Immaculée

 

Umunyamabanga wa Leta muri MINEDUC ushinzwe amashuri y’incuke, abanza n’ayisumbuye, Isaac Munyakazi
src.Igihe.com

 

25,977 total views, 2 views today

Leave a Reply

Your email address will not be published. Required fields are marked *