KONKA
Breaking News

Burera: Abanyarwanda baterwaga ipfunwe no kuvoma muri Uganda bahawe amazi

Burera: Abanyarwanda baterwaga ipfunwe no kuvoma muri Uganda bahawe amazi

Amafoto ari kugaragara ku mbuga nkoranyambaga agaragaza Guverineri w’intara y’Amajyaruguru Gatabazi Jean Marie Vianney ari kwishimira aya mazi yahawe abaturage, ari kumwe nabo n’abandi bayobozi batandukanye.

Video  yafashwe iragaragaza abaturage n’abayobozi bari iruhande rw’ivomo rimaze gufungurwa bacinya akadiho baririmba mu Rukiga bagira bati ‘Ebirunji niyo byeja’ ugenekeraje mu Kinyarwanda igira iti ” Ibyiza nibwo bikiza…”

Ni nyuma yuko abatuye aka gace babwiye itangazamakuru ko birirwa bacunaguzwa n’abanya-Uganda iyo bagiye kuvoma. Aho bavomaga ngo habaga hari amatangazo yuko Abanyarwanda bavoma nyuma, hiyongereyeho n’andi magambo abasezereza.

Abayobozi n’abaturage bacinye akadiho, ku ruhande iburyo hari Gitifu wa Kivuye wgereye Guverineri Gatabazi

Bidateye kabiri, Guverineri w’iyo ntara Gatabazi Jean Marie Vianney ntiyitaye ko ari mu ijoro, maze ajya gusura abaturage bo muri ako gace, abizeza ko ku wa kabiri w’iki cyumweru azaba yabagezeho.

Ayo mazi yaje kubageraho mbere ho umunsi umwe nkuko byemezwa n’Umunyamabanga Nshingwabikorwa w’uyu Murenge, Mugiraneza Ignace. Avuga ko amazi yahageze ku wa mbere w’iki cyumweru, Umuyobozi w’akarere ka Burera akahasura uwo munsi, ku wa Gatatu w’iki cyumweru akaba yaratashywe na Guverineri w’iyi ntara.

Guverineri afungura amazi

Uyu muyobozi yatangarije Bwiza.com ko bahashyize ibigega bya palasitiki muri utwo duce ku buryo ngo abahatuye batazongera kuvoma muri Uganda.

Ati “Nta muturage uzongera kujya kuvoma muri Uganda, kuko twajyanye ibigega bifata amazi ku mupaka. Biri ahitwa Mushunga ku Mupaka, Kanyenzugi na Murambo muri Bukwashuri.

Ibigega by’amazi

Akomeza avuga ko ikibazo cyari gihari ari amazi yageraga muri ako gace, ariko kuko yakomezaga, ugasanga abaturage bayabuze, ahubwo bavoma umwuka nyamara konteri ibara ko yakoreshejwe.

Ubu hashyizwe ibyo bigega bitatu mu rwego rwo gufasha abaturage mu buryo bwihuse, ariko ngo bari gushaka uburyo bazahubaka ibigega biramba.  Ikindi kizakomeza ngo ni ukwagura imiyoboro igeza amazi ku baturage muri uyu murenge ku buryo azagera ku kigero cy’100%.

Konteri y’amazi yajyaga ibara ko yakoreshejwe haje umwuka kuko yacagamo akomeza

Umunyamababanga Nshingwabikorwa w’Akagari ka Bukwashuri, Ruhumuriza Benjamin yavuze ko imidugudu ibiri ariyo ya Murambo na Nyamisare itari ifite amazi yayahawe. By’akarusho ngo aya mazi yahawe abo mu midugudu yo Shanja na Kanyenzugi yo mu Kagari ka Nyirataba. Hari kandi n’iyo mu kagari ka Rwasa, yayahawe ariyo ya Nyakira na Nyarutovu. Uyu muyobozi avuga ko iki kibazo cyakemutse.

Ubwo Guverineri Gatabazi yasuraga aba baturage yavuze ko atari azi ko amazi adarahari, nubwo ngo amatiyo y’amazi yahacaga, akavuga ko ari ikibazo inzego zitandukanye zakabaye zarakemuye kare.

Akadiho hari kose

Abo baturage bavugaga ko bacunaguzwa, Ndereyishuri Alfred w’imyaka y’amavuko 67 yagize ati “ Iyo tugiyeyo tugasanga ab’iwabo bari kuvoma, baratubwira ngo nimujye kuvoma iwanyu mu Rwanda, twebwe mwari mwabona tuza kuvoma mu Rwanda.” Rimwe na rimwe ngo barabacunaguza bakababuza no kuvoma bagataha batavomye.

Guverineri Gatabazi na Gitifi wa Kivuye bagiye gutaha ibigega

26,159 total views, 21 views today

Leave a Reply

Your email address will not be published. Required fields are marked *